Bilənlər bilir, standartlara görə, jurnalist informasiyanı ən azı iki müstəqil, bir-birindən asılı olmayan qaynaq təsdiqləyəndən sonra xəbər edə bilər. İstisna hal jurnalistin özünün şəxsən şahidliyi, olayı öz gözü ilə görməsi, izləməsidir.

Etiraf etmək lazımdır ki, bu sahədə vəziyyət bir o qədər də yaxşı deyil. Jurnalistlər dost-tanışdan eşitdikləri xəbəri dəqiqləşdirməyə ehtiyac görmürlər. Hələ üstəlik xəbərlə rəyi bir-birinə elə qarışdırırlar ki, qalırsan mat-məəttəl.

O günü bir xəbər gördüm, axırıncı cümləsi belə idi: “Yalançının atasına lənət!”

Bir neçə gün öncə gördüyüm xəbərlərdən biri isə kiminsə kimisə “neprav” çıxarması haqqında idi. Bəli, bəli, “neprav”, məhz bu cür də yazılmışdı.

Belə “xəbərlər” çoxdur e... saysız-hesabsız. Bir kitaba sığmaz, amma hər halda maraqlı təklifdir, bir kitab yazmaq olar bu haqq-hesablardan.

Hə, onu deyirdim axı, informasiyanı ən azı iki mənbədən dəqiqləşdirmək lazımdır və bu sahədə problemlər var.

Bəziləri isə mənbə söhbətini, türklər demiş, qıçından anlayır.

Aşağıdakı xəbərə diqqət:

(Etik olmadığı üçün adları və yerləri filankəs və filanla əvəz etmişik – red.)

“Filankəsov Filankəsin ölüm xəbəri yayılıb

Bu barədə məlumat verən həmkarlarımızdan birinin sözlərinə görə, onun qəfildən ürəyi dayanıb. Həmkarımız qeyd edib ki, bunu ona Filankəsin idarəsində işləyən yaxını bildirib.

İdarənin mətbuat xidmətinin əməkdaşı xəbərin yalan və şayiə olduğunu bildirdi”.

Əlavə şərhə ehtiyac varmı?

***

Bu günlərdə Xalq Şairi Nəriman Həsənzadənin ayağının üstündən maşın keçmiş və ağsaqqal yüngülvarı xəsarət almışdı. Xəbəri verdik, başlıqda kifayət qədər ehtiyatlı olmağa çalışdıq ki, yanlış rəy yaranmasın və kimsə bizdən inciməsin, kimsənin xətrinə dəyməyək.

Sağ olsunlar, əksər saytlar xəbərimizi istinadla verdilər. Ona görə, sağ olsunlar, deyirəm ki, son zamanlar “Dəli Nəzərəm, belə gəzərəm” deyən cayıllar istinad-zad hərləmirlər. İrad tutanda da adamı elə borclu çıxarırlar ki, qalırsan belə: “A kişi, mən neylədim axı?”

Sözüm bunda deyil.

Saytlardan biri N.Həsənzadə ilə bağlı xəbərə belə başlıq qoymuşdu: “Xalq şairinin üstündən maşın keçdi”.

İnanmıram ki, bu adamlar “Xalq şairinin ayağının üstündən maşın keçdi” ilə “Xalq şairinin üstündən maşın keçdi”nin fərqini bilməsinlər.

Ancaq əlahəzrət İP insanları çox şeyə vadar edir. Amma adamlıqdan bu qədər çıxmağın da yeri yoxdur. İndi təsəvvür edin, Xalq şairinin məsələdən xəbəri olmayan və bu sərlövhəni, fotonu görən oğlu, yaxud qızı hansı vəziyyətə düşür?

***

Yazını yekunlaşdırmaq istəyirdik ki, dostlardan biri link atdı. Açdıq. Sərlövhə belə idi: “Aygün Kazımova ayaqlarını göstərdi”.

Layihənin digər yazıları:

Maşında sevişməyin cəzası

Cazibədar aparıcının çiyələyi

Almaz Ələsgərlini soyundurdular

• "Maşa və Ayı"ya qadağa tələbi: Cizgi filmində Rusiya təbliğatı var?
• Mett Deymonu o əvəzləyəcək: Zendaya yeni Ceyson Born ola bilər
• Şərif Ağayar: "Bu romanı yazmaq məni ölümdən qurtardı” - Müsahibə