Fevralın 18-də Nizami kino mərkəzində “Dünya sübhdən günbatanadək” beynəlxalq kino layihəsi çərçivəsində “Bakı sübhdən günbatanadək” tammetrajlı sənədli filmin təqdimatı keçiriləcək. Bu barədə Kulis.az-a layihənin təşkilatçıları xəbər verib.

"Dünya sübhdən günbatanadək" Miroslav Dembinski və Maçyej Driqas tərəfindən yaradılmış orijinal layihədir. Layihə dünyanın müxtəlif şəhərlərindəki kino məktəblərinin tələbələrinə və gənc rejissorlara silsilə seminarların keçirilməsinə əsaslanıb. Bir neçə həftəlik kurs müddətində tələbələr müəllimlərin nəzarəti altında qısametrajlı sənədli filmlər kolleksiyası üzərində birgə çalışırlar. Nəticədə şəhərin canlı təsviri kimi 60 dəqiqəlik sənədli film istehsal olunur.

21 avqust – 7 sentyabr 2014-cü il tarixlərində Bakı şəhərində keçirilən “Bakı sübhdən günbatanadək” layihəsi çərçivəsində çəkilən qısa filmlərin arasında Ələkbər Əliyevin “17-ci mərtəbə”, Röyal Əliyevin “Balıqçı”, Mənzər Hüseynovanın “Xor”, Elvin Aşirovun “Müəzzin”, Murad Muradovun “Samovar”, Gülər Abbasovanın “Sovetskinin köhnə küçələri”, Səidə İsmayılovanın “Toy”, Elvin Aşirov, Murad Muradov, İmam Həsənovun “İbadət”, Eldar Albertsson “Ofisdə fasilə”, Eldar Albertssonun “Xalçalar”, Elnur Cəbrayılovun “Neft”, “Yarım-timsah”, Günel Qədirovanın “Neft işçiləri küçəsi”, “Heydər Əliyev Mərkəzi”, Məryəm Nəcəfzadənin “Attraksion”, “Çildağ”, Ramil Ələkbərovun “Pinəçi”, Fariz Əhmədovun “Zoopark” filmləri var.

Təqdimat mərasimində iştirak etmək üçün Polşadan layihənin müəllifləri və prodüserləri də dəvət olunublar.

Layihənin tərəfdaşları Polşanın Adam Mikiyeviç İnstitutu, Polşa Kino İnstitutu, TVP 2 Polşa Milli Televiziyası, Belsat kanalı və Polşa Xarici İşlər Nazirliyidir. Layihənin Azərbaycandakı tərəfdaşları Mədəniyyət və Turizm Nazirliyi və Azanfilm studiyasıdır.

• "Tarix bizə baxır və ümid edirəm ki, ürəyi bulanmaz..." - Yazıçı Stefano Bennidən sitatlar
• Gənclər Kitabxanasında Anım Gününə həsr olunmuş sərgi
• Türkiyədə İstanbul Saat Festivalı keçiriləcək