Kulis.az şair Alik Əlioğlunun yeni şeirlərini təqdim edir.
Biz onun adına sevgi deyirik
O an ki hər şey düzələcək
O an ki adamlar güləcək
O an ki uşaqlarımız
Əllərində qırmızı şarlar
Sıraya düzüləcək
Biz onun adına sərhəd deyirik!
Mənim uşaqlarım sərhəd istəmir.
Mən istəmirəm
Atam da istəmirdi...
Biz qəfəsdə öldük.
Biz yaşadığımız bu dar küçədə
Yekə papaqlı qoca bir adam
Ac qalmış quşlara yemək səpəcək
Yolu keçmək istəyən cavan bir adam
Qəfil əyilib dilənçi uşağın başından öpəcək.
Biz onun adına sevgi deyirik.
Mənim uşaqlarım sevgi istəyir
Mən istəyirəm
Atam da istəyirdi.
Biz sevgisiz ölürük...
Mən bütünlüklə
Atılmış körpələrəm,
Afrikada ac qalan uşaqlaram,
Nadan övlad böyütmüş
Kədərli qocalaram,
Peşman olmuş fahişələrəm.
Elə istəyirəm yekə bir adam
Lap yekə, ev boyda nəhəng bir adam
Bizim hamımızı bağrına bassın
Desin ki, ağlamayın,
Gəldim, Allaham!
Yeni kino: "Qaraçı qadının günəşi"
Yer palçıq, hava soyuq
Mən yeni kinoyam
"Qaraçı qadının günəşi"
Əvvəlimdə payızdır,
Adamlar xoşbəxt...
Qəzet oxuyur, bağ belləyir,
ağac əkirlər...
Qaraçı qadını var,
Adamları tutur bir-bir
Deyir
Günəş mənimdir...
Sevgi də var...
Janr: dramma
...
Amma...
...
Adamlar təkdir...
Yeni kinoyam
davamım ümidsiz
sonum kədərli...
amma möhtəşəm:
Qaraçı qadını ağlayır:
"günəşi itirmişəm..."
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
