Qurban Səidin “Əli və Nino” romanı əsasında çəkilən çoxseriyalı bədii filmin çəkilişləri maliyyə çatışmazlığı səbəbindən dayandırılıb. Filmin yaradıcı heyəti müxtəlif mənbələrə müraciət edərək maliyyə axtarışına çıxıb. Serialın rejissoru və baş rolun ifaçısı (Əli xan) Elvin Mirzəyevin Kulis.az-a verdiyi məlumata görə, filmin 45 faizi çəkilməyib. Bunlar batal (döyüş səhnələri) və kütləvi səhnələr (aşura mərasimi səhnəsi), pirotexnika tələb edən epizodlardır.
Serial əvvəlcə 12 seriya kimi nəzərdə tutulsa da sonradan onun 4 seriyada çəkilməsi qərara alınıb. “Əli və Nino” “Trem Tv Production”da ölkə prezidenti İlham Əliyevin müvafiq sərəncamına əsasən Milli Teleradio Şurasının sifarişi ilə çəkilir.
“Milli Teleradio Şurası bizə vəsait ayırıb və indi də bir qədər ayıracaq. Lakin bu imkanlar çox xərc tələb edən filmi bitirməyə kifayət etmir. Mən bu filmə çox bağlıyam. Tək istədiyim ortaya çox yaxşı bir film qoymaqdır. Əlavə maliyyə dəstəyi olarsa, biz filmin çəkilişlərini davam etdirər, bitirərik. Sadəcə bizə inansınlar və biz o filmi sona çatdıraq” –deyə rejissor Kulis.az-a açıqlamasında bildirib.
Filmdə ikinci dərəcəli qəhrəmanlardan birini – Səfər xanı canlandıran aktyor Ayşad Məmmədov Kulis.az-a verdiyi açıqlamada hələ bir neçə çəkiliş gününün qaldığını söyləyib:
“Biz əlbəttə əhvalatı, süjet ardıcıllığı ilə yox, ordan-burdan çəkirik. Bu, kinoçəkilişin qaydasıdır. Maliyyə problemi yaranıb və çəkiliş yarımçıq qalıb. Amma indiyə qədərki çəkilişlər üçün qonorarlarımız ödənilib”.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər