Sentyabrın 16 da AYB-nin “Natavan” klubunda görkəmli dramaturq Cəfər Cabbarlının 115 illiyinə həsr olunmuş “Cəfər Cabbarlı Mükafatı”nın təqdimat mərasimi keçirilib. Kulis.az-ın Gənc Tamaşaçılar Teatrının mətbuat xidmətinə istinadən verdiyi xəbərə görə, Mədəniyyət və Turizm İdarəsinin dəstəyi, Cəfər Cabbarlı adına Mədəniyyət, Elm və Təhsilin İnkişafına Yardım İctimai Birliyi və ədibin ev-muzeyinin təşkilatçılığı ilə həyata keçirilən tədbirdə mükafatlandırma mərasimi baş tutub.

Kino nominasiyasında yazıçı, ssenarist İlqar Fəhmi, xalq artistləri Səidə Quliyeva, Ağakişi Kazımov, Hacı İsmayılov, Məleykə Əsədova, ədəbiyyat nominasiyası üzrə filologiya elmləri doktoru və professorlar Gülşən Əliyeva-Kəngərli, Himalay Qasımov, Tahirə Məmməd, Fikrət Rzayev, jurnalistika nominasiyasında Zemfira Kürdəxanlı və şairə Zərəngiz Dəmirçi Qayalı, təhsil və mədəniyyət nominasiyası üzrə Azərbaycan klassik ədəbiyyatının gənc nəslə təbliğində xidmətlərinə görə Xatirə Həşimzadə (Xızı şəhəri), Əbilov adına mədəniyyət mərkəzinin bədii rəhbəri Mirəhməd Əsgərov mükafata layiq görülmüşlər. Mükafatın xüsusi diplomu Azərbaycan-Türkiyə ədəbi-mədəni əlaqələrinin inkişafında xidmətlərinə görə Fırat Universitetinin doktoru Süleyman Kaan Yalçına təqdim edilmişdir.

Azərbaycan Dövlət Gənc Tamaşaçılar Teatrının baş redaktoru, Əməkdar Mədəniyyət İşçisi Səriyyə İsmayılova Azərbaycan mədəniyyətinin təbliğindəki xidmətlərinə görə sözügedən mükafata layiq görülmüşdür.

Mərasimin sonunda muzeyin direktoru Qəmər Seyfəddinqızı çıxış edərək mükafat alanları təbrik etmişdir.

Məlumat üçün bildirək ki, “Cəfər Cabbarlı Mükafatı” ilk dəfə C.Cabbarlı Ev Muzeyinin layihəsi əsasında “C.Cabbarlı adına mədəniyyət, elm və təhsilin inkişafına yardım ictimai birliyi”nin iştirakı və “BP” şirkətinin sponsorluğu ilə 2001-ci ildə təsis olunmuşdur.

• Stenford alimlərindən unikal layihə - Ayasofiyanın səsi rəqəmsallaşdırıldı
• Qafqazın nüvəsindən qalib dövlət kimi doğulan Azərbaycan... - Yaddaşdan nəticə çıxara bildikmi?
• Azərbaycan Jurnalistlərinin IX qurultayı keçiriləcək