Bu gün görkəmli tərcüməçi Vilayət Hacıyevin 70 yaşı tamam olur. Kulis.az bu münasibətlə Vilayət müəllimi təbrik edir və tanınmış yazıçı Saday Budaqlının onun haqqında yazdığı “Canım mənim” yazısını oxucuların diqqətinə çatdırır.

“Salam, ustad”, “Sabahın xeyir, professor”, “Böyük insan”... O da gülümsəyir, qıvraq yerişlə qarşına yeriyir, hal-əhval tutur, kiminsə kefini soruşur, kiməsə atmaca atır, qadınlara xoş söz deyir... Baxıram, baxıram, deyirəm, kənddən çıxasan, özü də bu qədər centlmen olasan, üstəlik, alman dilini biləsən...

Bu dediklərim dostumuz Vilayət Hacıyevə aiddir. Düzgün insan, səmimi insan... Çoxları, yəqin, bilmir, Vilayət müəllim ədəbiyyata nasir kimi gəlib, hekayələri çap olunub. Sonra bizə yazığı gəldiyindən tərcüməyə keçib. Hər sözün üstündə əsən mükəmməl, ustad tərcüməçi. Vilayət müəllim kimləri tərcümə eləməyib? Stefan Sveyq, Frans Kafka, Remark, Herman Hesse, Lion Feyxtvanger, Henrix Bööl... Nəhəng yazıçıların böyük əsərləri: “Zəfər tağı”, “Yalquzaq”, “Lautenzak qardaşları”, “Bir təlxəyin düşüncələri”, “Kişisiz ev” və onlarla başqa əsər...

Vilayət müəllimin zəhməti az-çox qiymətləndirilib. Keçən il Mədəniyyət Nzirliyinin “Qızıl kəlmə” mükafatını alıb. Hələ Vilayət müəllim ordenlə də təltif olunub – “Avstriyanın elm və incəsənət sahəsində I dərəcəli fəxri xaç” ordeni.

Bu gün dostumuzun 70 yaşı tamam olur. Fikirləşmişdik necə keçirəcəyik, harada toplaşacağıq. Alınmadı. Koronairus girdi araya. Eybi yox, inşallah, əvəzini çıxarıq.

Böyük ustad, böyük insan, uzaqdan-uzağa qucaqlayıb öpürəm, təbrik eləyirəm, cansağlığı arzulayıram.

Sən bütün gözəlliklərə layiqsən!

• Nüşabə Ələsgərli ilə səmimi söhbət - Uşaqlıq xatirələri və həyat dərsləri
• Əməkdar artist Vahid Əliyev: "Röya, sən nə vaxt sənətkar oldun?" - Müsahibə
• Özündən 17 yaş kiçik həmkarı ilə eşq yaşayan Xalq artisti kimdir?