Kulis.az Ulucay Akifin "Yay mənzərələri" silsiləsindən yeni haykularını təqdim edir.
Çəhrayı dondurma
Yaydı
Məhəllə mağazasının qabağında
yığışan uşaqlar
Paketdən çıxan
dondurmanın rənginə sevinir
Tut ağacı
Yaydı
Uzun, kölgəli yollarda
Ayaqqabılar sərxoş olur
Tut şirəsindən
Sevgililər
Yaydı
Parkda voleybol oynayır tələbələr
Bir oğlan topu ancaq O qıza atır
Təsadüfən...
Xoşbəxtliyin rəsmi
Yaydı
Qaçdı-tutdu oynayan uşaqlarına baxır analar
Birazdan ata da gələcək
Əlində dolu zənbil
Axşambazarı
Yaydı
Yol qırağına düzülmüş meyvələr
Axşamçağı daha ucuza satılır
Şeş qoşa
Yaydı
Ağac altında nərd oynayan qocalar
Ömrün geridə qalan rəqəmlərinə baxıb
Təsəlli axtarır zərdə.
