Bu gün 10 Mart Milli Teatr Günü münasibəti ilə Azərbaycan Dövlət Gənc Tamaşaçılar Teatrında “Teatrda bir gün” layihəsi çərçivəsində açıq qapı keçirilib.
Teatrın mətbuat xidmətindən Kulis.az-a verilən məlumata görə layihə əsasında teatra dəvət olunan qonaqlar və tamaşaçılar üçün teatrın foyesində qısa gəzinti təşkil olunub. Mədəniyyət Nazirliyinin təşəbbüsü ilə 10 mart – Milli Teatr Günü ilə bağlı teatrda bir sıra televiziya kanallarının iştirakı ilə telemarafon da keçirilib.
Daha sonra Xalq artisti Ağaxan Salmanlının “Möcüzəli pillələr” pyesi əsasında eyniadlı tamaşa nümayiş etdirilib.
Quruluşçu rejissoru Nicat Kazımov olan tamaşada teatrın aktyorları Əməkdar artist Elnur Bəhrəmxan, İlhan Sadıqov, Ramil Məmmədov, Anar Seyfullayev, Elşən Şıxəliyev, Zülfiyyə alhüseynova, Zümrüd Quliyeva, Müşfiq Əliyev, Yusif Dadaşov, Anar Səfiyev, Xaliq Bəkirov, Aygün Fətullayeva, Bəhram Əliheydər, Nurlan Süleymanlı, Araz Pirimov, İlahə Əmirxanova, Hüseyn Bayramov iştirak ediblər.
Səhnə əsərinin qurulmasında əsas məqsəd tamaşaçını teatr mühiti ilə, tamaşanın qurulması, aktyorları qrim otağından səhnəyə qədər aparılan hazırlıq prosesi ilə tanış etməkdir. Yarıbədii, yarı praktik tamaşada izləyicilər özləri də prosesin iştirakçılarına çevrilirlər. “Möcüzəli pillələr” həm teatr haqqında məlumat verir, həm də səhnənin sirli məqamlarını açır.
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
