"Gərək şairləri foruma buraxmasınlar. Onlar dil haqqında danışa bilməzlər..."

Bu sözləri Şamaxıda keçirilən "Azərbaycan dili və Ədəbiyyatı" Forumunda akademik Nizami Cəfərov deyib.

Kulis.az bu barədə şairlərin fikrini öyrənib.

Salam Sarvan:

"Düzü, mən həmin forumda iştirak eləməmişəm: nə Şamaxıdakı tədbirlərində oldum, nə də Bakıdakı. Üstünüzə sağlıq, neçə illərdi böyrəyimdə duzlaşma var, mütəmadi kəskin ağrıları olur. Tərslikdən, rusların “pristup” dediyi bu tutmalar ədəbiyyatla bağlı kütləvi tədbirlərə dəvət olunduğum ərəfələrdə baş qaldırır. Neçə illərdi bu çıqqılı-çıqqılı böyrək daşları imkan vermirlər ki, kütləvi ədəbiyyat tədbirlərinə qatılaraq sanballı ədibə çevrilim.
Nizami müəllim məhz belə deyib? Deyib, dil şairlərin sahəsi deyil? Nə deyim?! Bir tərəfdən fəlakətdi, bir tərəfdən də taleyin üzü çox sərtdi: çıxıb getməyə bəxtəbəxt bir ölkə seçmək üçün qlobusu qabağına qoyub loto qurğusu kimi fırladırsan, tərslikdən, həmişə gəlib bir okean dayanır adamın burnunun ucunda".

Aqşin Yenisey:

"Alternativ fikir eşitmək istəmirlər və bunu açıq bəyan edirlər. Nizami Cəfərov üçün ən yaxşı şair ölü şairdi. Bu forumla bağlı məsələ deyil, düşüncə ilə bağlı məsələdir. Anar da hər dəfə deyir ki, ölkədə ədəbi hadisə baş vermir. Bununla həm xalqa, həm hökumətə eşitdirir ki, bizdən bərk yapışın. Soğan da olsaq, nağdıq. Acı nəticələri olacaq bu qocafəndiliyin".

Qəşəm Nəcəfzadə:

"Gərək filoloq, akademik bu sözü deməyəydi. dili yaradan və inkişaf etdirən şair və yazıçılardır. Alimlər isə onun sintaksisini, morfologiyasını, üslubunu tərtib və tədqiq edənlərdir. Onlar yazıçıdan sonra gəlir".

Xəyal Rza:

"Görünür, hörmətli akademik dillə bağlı müzakirələri nəzərdə tutub. Əlbəttə, təkcə dil yox, istənilən ciddi məsələlərin müzakirəsinə işi bilən mütəxəssislər cəlb olunmalıdır. Amma dil təkcə dilçilərin işi deyil. Belə olsaydı, dilimiz bu günə düşməzdi. Azərbaycan ziyalısı, ədəbiyyatçısı dillə bağlı həyəcan təbili çalırsa, dil mütəxəssisləri problemlərin aradan qaldırılması üçün çıxış yolu tapmalıdır. Hamımızın dərdimiz dildir."

Aqşin Evrən:

"Aşağıdakı cümlə hörmətli Nizami Cəfərovun “Azərbaycançılıq ideologiyası… və Səməd Vurğunun azərbaycançılıq idealları” adlı məqaləsindəndir:

“Vaqifin (və Səməd Vurğunun!) “şirin dili” bütün maneələrə rəğmən, müasir Azərbaycan ədəbi dilini formalaşdırdı, müasir ədəbiyyatın, elmin, publisistikanın ifadə-ünsiyyət vasitəsinə çevrildi, tarixin qırılmağa hesablanmış bağları (xronologiyası) bərpa edildi”.

Göründüyü kimi, vaxtında şairlər dil təəssübkeşi olmasaydılar, bu gün Nizami müəllim forumda işlətdiyi cümləni, Allah bilir, hansı dildə quracaqdı və ya heç o forum keçirilməyəcəkdi.

Tarix boyu coğrafiyamızda şeir hətta müqəddəs mətnlərdən də çox oxunub. Bu gün də şeirlərin, onlara yazılmış mahnıların oxunma-dinlənmə sayı yüzminlərə, milyonlara çatır.

Dolayısı ilə cəmiyyət hələ də dili şeirin vasitəsilə mənimsəyir, qavrayır. Belə bir məqamda “dil və ədəbiyyat forumuna şairləri çağırmayın” demək mahiyyətcə “futbol matçında meydana azyaşlı şahmatçıları buraxaq, əllərində fiqurlar, qaçsınlar ora-bura” deməkdir".

• Beyonsun fanatlarından "irqçilik" ittihamı
• Məşhur jurnalist vəfat etdi
• Sankt-Peterburqda "İblis və..." tamaşasının premyerası olub