Bu gün Vokalçıların Bülbül adına IX Beynəlxalq Müsabiqəsinin həlledici, III turu olacaq. Bu turda 16 iştirakçı birincilik uğrunda öz məharətini sınayacaq.

Kulis.az xəbər verir ki, I və II turlarda fortepianonun müşayiəti ilə çıxış etmiş iştirakçılar müsabiqənin qaydalarına görə, III turda simfonik orkestrin müşayiəti ilə çıxış edəcəklər.

16 iddialının III tur və qala-konsertdə çıxışlarını Əməkdar artistlər Əyyub Quliyev, Fuad İbrahimov, Mustafa Mehmandarov və Murtuza Bülbülün dirijorluğu ilə simfonik orkestr müşayiət edəcək.

İyunun 6-da müsabiqə iştirakçıları Azərbaycan Dövlət Akademik Filarmoniyasının simfonik orkestrinin müşayiəti ilə məşq-çıxış ediblər.

Qeyd edək ki, Vokalçıların Bülbül adına IX Beynəlxalq Müsabiqəsində ikinci tura keçmiş 41 nəfər münsiflər heyətinin qarşısında öz məharətlərini sınayıblar. Vokalçılar müsabiqənin şərtlərinə uyğun olaraq, Bülbülün repertuarından “Sənsiz” və “Sevgili canan” (musiqi: Ü.Hacıbəyli, söz: N.Gəncəvi), “Ölkəm” (A.Zeynallı, C.Cabbarlı) və “Ulduz” (F.Əmirov, M.Rahim) romanslarından birini və əvvəlcədən özlərinin təqdim etdikləri və təşkilat komitəsinin təsdiq etdiyi siyahı üzrə dünya operalarından (öz səs tembrlərinə uyğun) ariya ifa ediblər. Müsabiqənin şərtlərinə görə, bütün əsərlər orijinalın dilində ifa edilib.

Münsiflərin dəyərləndirməsindən sonra 41 iştirakçıdan 16 nəfəri III tura vəsiqə qazanıb. Onların arasında Azərbaycandan da iki nəfər – Dövlət Akademik Opera və Balet Teatrının solistləri Mahir Tağızadə (bariton) və Atəş Qarayev (tenor) var.

Xatırladaq ki, müsabiqəyə Azərbaycan, Türkiyə, Rusiya, Qazaxıstan, Qırğızıstan, Cənubi Koreya, Makedoniya və digər ölkələrdən ümumilikdə 140 nəfərdən çox 18-36 yaş arasında vokalçı qatılıb.

Qaliblərin mükafatlandırılması mərasimi və final konserti iyunun 9-da Şuşada, Bülbülün ev-muzeyinin həyətində keçiriləcək.

• Xalq artistləri Özbəkistanda
• Xalaoğlu söhbəti öldü - Xalaqızılar nə edəcək?
• Ölkəmiz Rusiya Milli Teatrları Konqresində fəxri qonaq olub