Beynəlxalq Muğam Mərkəzində (BMM) “Azərbaycan muğamı” adlı yeni layihə çərçivəsində tar ifaçılıq sənəti ilə bağlı silsilə ustad dərslərinin ilki keçirilib.

Kulis.az xəbər verir ki, dərsdən əvvəl çıxış edən BMM-in direktoru Sahib Paşazadə iştirakçılara layihənin əhəmiyyəti barədə məlumat verib. O, layihənin məqsədinin klassik ifaçılıq məktəbimizin yaşadılması və gələcək nəsillərə ötürülməsi, ustad-şagird ənənələrinin qorunması olduğunu diqqətə çatdırıb. Bildirib ki, il ərzində mütəmadi olaraq təşkil ediləcək ustad dərslərində tar ifaçılıq sənətinin görkəmli nümayəndələrinin iştirakı nəzərdə tutulub. Ustad dərslərində iştirak sərbəstdir və maraqlanan hər kəs iştirak edə bilər.

Tanınmış tarzən və pedaqoq Elxan Müzəffərov muğam sənətinin məsuliyyət və diqqət tələb etdiyini deyib. O, layihə üzrə ilk ustad dərsinin ona həvalə olunmasından məmnunluğunu bildirib.

Daha sonra dərs Milli Konservatoriya nəzdində Musiqi Kolleci tələbələrinin iştirakı ilə davam edib.

“Rast” muğamına həsr olunan dərsdə kollecin direktoru Nazim Kazımov çıxış edərək 57 il əvvəl Elxan Müzəffərovdan tar sənətinin sirlərini öyrəndiyini deyib, gənclərə bacardıqları qədər ustaddan ifaçılıq texnikalarını mənimsəməyi tövsiyə edib.

Tanınmış tarzənlərin də qatıldığı tədbirdə muğam ifaçılığı, üslub xüsusiyyətləri, texnikası, "Rast"ın şöbələrinin ifasında mizrab ştrixləri və bölgüləri, ifa zamanı sürət - pauza mövzuları diskussiya və ifa nümayişləri ilə yadda qalıb. Nəzəri məlumatlar əyani ifalarla diqqətə çatdırılıb.

• Ən ağır cinayətlərə qarşı mübarizə aparan qadın - Bu gün Nobel Sülh Mükafatını qazanan Navi Pillay kimdir?
• Böyük haqsızlıqların kiçik bəhanəsi...
• Məşhur yazıçı ilə nəşriyyat arasında süni intellekt qalmaqalı