Bu gün görkəmli rejissor Tofiq Tağızadənin doğum günüdür.

Kulis.az onun ən yaxşı 5 filmini təqdim edir.

"Arşın mal alan"

Bakı. XX əsrin əvvəli. Gənc tacir Əsgər (Həsən Məmmədov) evlənmək fikrinə düşür. Lakin dövrün qaydalarından fərqli olaraq o, qızı toydan öncə görüb, sonra evlənmək istəyir. Bəs nə etməli? Bu məsələnin həllində dostu Süleyman (Hacımurad Yegizarov) onun köməyinə gəlir...

Film bəstəkar Üzeyir Hacıbəyovun eyniadlı musiqili komediyası əsasında ekranlaşdırılıb.

Film 1967-ci ildə Tbilisidə I Zaqafqaziya və Ukrayna respublikaları filmlərinin "Prometey-67" zona kinofestivalında Ən yaxşı musiqili filmə görə Gürcüstan SSR Bəstəkarlar İttifaqının prizinə layiq görülüb.

"Yeddi oğul istərəm"

Film inqilabın qələbəsinə inanan və qələbə naminə canlarından belə keçməyə hazır olan qəhrəman oğulların hekayəsidir.

Film Xalq şairi Səməd Vurğunun "Komsomol poeması"nın motivləri əsasında çəkilib və Azərbaycanda sovet hakimiyyətinin qurulmasının 50 illiyinə ithaf olunub.

"Uzaq sahillərdə"

Film Sovet İttifaqı Qəhrəmanı Mehdi Hüseynzadənin İkinci Dünya müharibəsində İtaliya və Yuqoslaviyada faşist işğalçılarına qarşı apardığı mübarizəyə həsr edilib.

Film 1959-cu ildə Kiyevdə Ümumittifaq kinofestivalının diplomuma layiq görülüb və bəstəkar Qara Qarayevə filmin musiqisinə görə II mükafat verilib. Film, həmçinin Daşkənd kinofestivalının qalibi (1959) olub.

"Mən ki gözəl deyildim"

Filmin mərkəzində Səidə adlı (Xuraman Qasımova) gənc qızın taleyi durur. Burada İkinci Dünya müharibəsi illərində kənddə adamları bir-birinə bağlayan dostluq əhval-ruhiyyəsi, əzizləri cəbhədə həlak olan ailələrin dərdinə həmyerlilərin şərik çıxmaları, ümumi işin xeyrinə gecə-gündüz işləməyə hazır olmaları əks etdirilib.

Birinci çəkiliş günündə faciə baş verib. Lənkəranın Port İliç (Liman) qəsəbəsində filmin ilk epizodunu çəkən zaman pirotexnik partlayış effektini yaratmaq istəyirlər. Lakin texniki səhv ucbatından əsl partlayış baş verir. Nəticədə, dörd nəfər – fotoqraf, iki assistent, rejissor Ramiz Əsgərov həlak olur. Beş nəfər isə yaralanır. Yaralılar arasında çəkiləcək filmin operatoru Rasim Ocaqov, aktyor Ələddin Abbasov da var idi. Sonradan Ağarza Quliyev, Tofiq Tağızadə filmi başqa quruluşda çəkiblər.

Film yazıçı Bayram Bayramovun eyniadlı povesti əsasında ekranlaşdırılıb.

"Köpək"

Film köpəyə dönmüş məzlum insanlar, onların faciəsi haqqındadır. İş axtaran bir qrup insan oğurlanaraq qul kimi işlədilir.

Eyni zamanda, filmdə deyilir ki, hansı şəraitə düşürsə düşsün, qarşısına nə kimi çətinliklər çıxırsa çıxsın, insan insan olaraq qalır.

• "Ceyn Eyr"in tənhalığa məhkum müəllifi - Höte onun haqqında nə yazırdı?
• Amerikalılar həqiqətənmi Ayda olublar?
• Rafaelin sirli tablosunun altından nələr çıxdı? - Qadın idealının əsrlərlə dəyişən siması