Cəfər Cabbarlı adına Azərbaycan Dövlət Teatr Muzeyinin 90 illiyi münasibətilə tədbir keçirilib.

Kulis.az xəbər verir ki, tədbirdə muzeyin fondunda qorunan və əməkdaşların hazırladığı eksponatlardan ibarət videoçarx nümayiş olunub.

Muzeyin direktoru Əməkdar mədəniyyət işçisi Sevinc Mikayılova çıxışında Azərbaycan milli peşəkar teatrının tarixi haqqında məlumat verib. Teatr Muzeyinin keçdiyi inkişaf yolundan, bugünkü fəaliyyətindən, habelə planlarından söhbət açan direktor qurumun mədəniyyət ocağı olması ilə yanaşı, həm də elmi-tədqiqat sahəsinə də töhfələr verən unikal müəssisə olduğunu deyib.

Azərbaycan Mədəniyyət İşçiləri Həmkarlar İttifaqının Respublika Komitəsinin kütləvi işlər üzrə müdiri Əfsanə Güləhmədova muzeyin rəhbər heyətinə fəxri fərmanlar təqdim edib.

Tədbirdə Xalq artistləri Hacı İsmayılov, Mərahim Fərzəlibəyov, Nurəddin Mehdixanlı, Əməkdar incəsənət xadimləri Məryəm Əlizadə, İlham Rəhimli, Azərbaycan Dövlət Akademik Milli Dram Teatrının bədii rəhbəri Mehriban Ələkbərzadə, Əməkdar mədəniyyət işçiləri Zərifə Məlikova, Qəmər Seyfəddin qızı, Alla Bayramova, filologiya üzrə fəlsəfə doktoru Nəzakət Qafqazlı muzeyin ictimaiyyət arasındakı nüfuzunu vurğulayıblar.

Sonda Azərbaycan Dövlət Akademik Opera və Balet Teatrının və Azərbaycan Dövlət Akademik Musiqili Teatrının aktyorları bədii kompozisiyalar təqdim ediblər.

• İkram ilә sәcdә qılar altmış üç adam nәdәn? - Aşıq Alı
• Mühacir mətbuatımızın fəallarından biri - O, niyə Tiflisdə həbs edilmişdi?
• Auşvitsdə qətlə yetirilən yəhudilərin nadir görüntüləri Berlində nümayiş etdirilir