Kulis.az Mina Rəşidin yeni şeirlərini təqdim edir.

Mənim doğma vətənim

Azərbaycan adlanır
Mənim doğma vətənim.
Azərbaycan dilidir
Mehriban ana dilim.

Vətənimin paytaxtı
Yaraşıqlı Bakıdır.
Möhtəşəm Qız qalası
Bakının baş tacıdır.

Dinim İslam dinidir
Vətənim Odlar yurdu.
Torpağımı qoruyur
Böyük, güclü bir ordu.

Bayrağım

Səni enməyə qoymaz
Doğma Yurdum - dayağım.
Harda qalib oluruq
Dalğalanan bayrağım!

Sənə zirvə yaraşır
İgid elimdəm güc al!
Azərbaycan bayrağı,
Başım üstündə ucal!

Səni qorumalıyıq
Doğma adımız kimi.
Səni unutmarıq biz
Vətən andımız kimi!

Ana dilim

Ana dilim bal kimi
Danışmaqdan doymuram.
Mən onu neçə dilin
İçində qoruyuram.

Anamın laylasıyla
Mən boy atıb böyüdüm.
Onun şirin diliylə
Fərəhlənib öyündüm.

Çoxlu nağıllar deyib
Nənəm bu dildə mənə.
Əlifbanı öyrəndim
Mən sevinə-sevinə.

Çox sevirəm yurdumun
Bayrağını, himnini
Mən sevirəm anamı
Həm də ana dilimi.

Bizim xalçamız

Güllü naxışlı,
Yaşıllı, allı.
Xalça toxudu
Nənəm Sayalı.

Bizim xalçamız
Uçacaq indi.
İçindən atlar
Qaçacaq indi.

Burda dəvələr
Düzülüb yola.
Zınqırovlarla
Səs sala-sala.

Bizim xalçamız
Necə əzizdir.
Tariximizdir,
Keçmişimizdir.

Uçar göylərə
Səmada süzər.
Bizim xalçamız
Dünyanı gəzər...

Qız qalası

Başı göylərə çatan
Bir qalam var, möcüzə...
Bu sehirli abidə
Nələr söyləyir bizə?

Elə vüqarla durub
Əzəmət simvoludu.
Bir sənət incisidi
İçi sirlə doludu.

Gözəllikdə tayı yox
Nağıldı, əfsanədi...
Adı Qız Qalasıdı
O Bakının rəmzidi...

• Natəvan Dəmirçioğlu: "Mən mütləq Qarabağ düyününü açmalı idim" - Müsahibə
• Milli Ensiklopediyanın redaksiya heyətinin yeni tərkibi təsdiqləndi
• Orbakayte Rusiyaya qayıtmaqdan imtina etdi