İyunun 24-də Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin (MEMİM) təşkilatçılığı və Rəşid Behbudov adına Dövlət Mahnı Teatrının dəstəyi ilə “Sənətkarın dostu” layihəsinin növbəti görüşü keçirilib.

Kulis.az xəbər verir ki, 26 İyun - Silahlı Qüvvələr Gününə həsr olunmuş görüşün qonağı Azərbaycanın hərbi diktoru, hərbi-vətənpərvərlik nəğmələrinin ifaçısı Şəmistan Əlizamanlı olub.

MEMİM-in əməkdaşı Riad Cəbrayılovun moderatorluğu ilə keçirilən tədbirdə 44 günlük Vətən müharibəsində Qələbənin əldə olunmasında hərbi nəğmələrin rolu, gənclərin milli ruhda tərbiyə edilməsi istiqamətində söhbət aparılıb.

Görüşdə MEMİM-in direktor vəzifəsini icra edən Vüqar Hümbətov qəhrəmanlığa həsr olunmuş mövzularda müxtəlif formatlı tədbirlərin təşkilinin Mərkəzin prioritetlərindən biri olduğunu bildirib.

Görüş zamanı Şəmistan Əlizamanlı “Ana vətən”, “Cənab leytenant” və “Can Azərbaycan” Azərbaycan Dövlət Nəfəs Alətləri Orkestri (bədii rəhbər - Əməkdar incəsənət xadimi Əlibala Rzayev) “Marş”, “Vətən marşı”, Niyazi adına Şuşa şəhər Uşaq İncəsənət Məktəbinin kollektivi “Şuşa fatehləri” əsərlərini səsləndirib.

Şəhid ailə üzvləri, qazilər və Bakı şəhərində fəaliyyət göstərən uşaq musiqi və incəsənət məktəblərinin iştirakı ilə keçirilmiş tədbirdə qonaqları maraqlandıran suallar cavablandırılıb.

Xatırladaq ki, “Sənətkarın dostu” layihəsi çərçivəsində mədəniyyətin müxtəlif istiqamətləri üzrə sənət xadimlərinin iştirakı ilə paytaxt və regionlarda maarifləndirici, musiqili və interaktiv görüşlərin təşkili nəzərdə tutulur.

Layihənin ilk görüşü iyunun 1-də Üzeyir Hacıbəylinin ev-muzeyində Xalq artisti, professor, pianoçu Ülviyyə Hacıbəyovanın iştirakı ilə keçirilib.

• “20 Yanvar – milli yaddaşımızın iradə gücü” adlı anım tədbiri keçirildi
• Tablolarında erməni vandalizmini çəkən rəssam - Azərbaycan rəngkarlığında hansı janrlar onun adı ilə bağlıdır?
• Musiqili Teatrın yeni layihəsi: "Şahmaran" əfsanəsi əsasında