Sumqayıt Dövlət Dram Teatrı rəhbərliyinin təşəbbüsü ilə sənət ocağında teatrın baş rejissoru, respublikanın Xalq artisti, iki dəfə Qızıl Dərviş mükafatı laureatı, Sənətkar və Tərəqqi medalçısı, Prezident mükafatçısı Firudin Məhərrəmovun 65 illik yubiley tədbiri keçirilib.

Kulis.az xəbər verir ki, birinci hissədə teatrın foyesində yazıçı-dramaturq Hafiz Ataxanlının Firudin Məhərrəmovun yaradıcılığını əks etdirən “Altıncı hücrənin remarkası” kitabının təqdimat mərasimi baş tutub.

Şair, əməkdar mədəniyyət işçisi, professor Rafiq Yusifoğlu, yazıçı-ssenarist, əməkdar jurnalist Eyruz Məmmədov, Sumqayıt şəhər İcra hakimiyyəti yanında ictimai-şuranın sədri, yazıçı-esseist Hümbət Quliyev, AYB Sumqayıt bölməsinin sədri Gülnarə Cəmaləddin, Mahmud Kaşqari mükafatı laureatı, şair İbrahim İlyaslı, “Xalq qəzeti”nin şöbə müdiri, əməkdar jurnalist, şair Əli Nəcəfxanlı, əməkdar mədəniyyət işçisi, xalçaçı rəssam Fazil Abbasquluzadə, şair Xaqani Abbasəli Öztürk və başqaları Sumqayıtın ədəbi və teatr mühitinin zənginliyindən, sənətə, sənətkara həsr olunmuş kitabın məziyyətlərindən danışıb, yubilyara yaradıcılıq uğurları arzulayıblar.

Sonda tədbirin moderatoru, əməkdar artist Cəlal Məmmədov kitabın müəllifi Hafiz Ataxanlını və yubilyar Firudin Məhərrəmovu mikrafon önünə dəvət edib.

Çıxışçılar kitabın ərsəyə gəlməsində və yubiley tədbirinin gerçəkləşməsində göstərdiyi diqqət və dəstəyə görə Sumqayıt şəhər İcra hakimiyyətinin başçısı Zakir Fərəcova minnətdarlıqlarını bildiriblər.

Yubiley proqramı əməkdar artistlər İlahə Səfərovanın və Cəlal Məmmədovun moderatorluğu ilə başlayıb.
Sumqayıt Dövlət Dram Teatrının truppasının musiqili təbrikindən sonra monitorda F.Məhərrəmovun həyat və yaradıcılığı haqqında tanıtım xarakterli videoçarx göstərilib.

Azərbaycan Teatr Xadimləri İttifaqının sədri, Xalq artisti Hacı İsmayılov, Xalq artisti, Şöhrət ordenli rejissor Cənnət Səlimova, Akademik Milli Dram Teatrının nümayəndələri Xalq artisti Sabir Məmmədov, İrəvan Dövlət Azərbaycan Dram Teatrının direktoru, Əməkdar mədəniyyət işçisi İftixar Piriyev, Bakı Bələdiyyə Teatrının baş rejissoru Mərahim Fərzəlibəyov, truppa müdiri İsmayıl Atakişiyev, Mingəçevir Dövlət Dram Teatrının direktoru, Əməkdar artist İntiqam Soltan .

Uzun illər Sumqayıt Dövlət Dram teatrında çalışmış Xalq artisti Valeh Kərimov təbriklərini çatdırıblar.
Eyni zamanda qısa səhnəciklər oynanılıb. Natiq Məmmədov, Elay Xasıyev və Şəmistan Muradxanlı maraqlı musiqi nömrələri ifa edib.
Sumqayıt Dövlət Dram Teatrının gəncləri xüsusi nömrə ilə yubilyarın qarşısına çıxıb. Teatrın rəssamı Firudin Məhərrəmovun portretini hədiyyə edib. Sonda söz yubilyara verilib.

Xalq artisti bu möhtəşəm yubiley tədbirinin gerçəkləşməsində əməyi olan direktor Samir Şəfiyevə, ssenari müəllifi Hafiz Ataxanlıya, quruluşçu rejissor Ümid Abbasa və əlbəttə, aktyorlara təşəkkürünü bildirib.

• Epifaniya: Dini bayram, yoxsa xalq ənənəsi?
• Stalinin alnından öpdüyü azərbaycanlı aktrisa - Bir ildə həyat yoldaşını və qızını itirən Xalq artistinin faciəvi həyatı
• Dəniz Əsədova yenidən hakim qarşısında