Bu gün Azərbaycan heykəltaraşlıq məktəbinin görkəmli nümayəndəsi, Xalq rəssamı Tokay Məmmədovun anadan olmasından 98 il ötür.

Kulis.az bu münasibətlə sənətkarın həyatı və fəaliyyəti haqqında faktları təqdim edir.

Tokay Məmmədov İmadəddin Nəsimi, Məhəmməd Füzuli, Üzeyir Hacıbəyli kimi tarixi şəxsiyyətlərin heykəllərinin müəllifi kimi tanınır. Rusiyada və Azərbaycanda ali təhsil alan sənətkar, heykəltaraşlıq sənətinin inkişafında mühüm rol oynayıb, pedaqoji fəaliyyət göstərərək yeni nəsil sənətkarların yetişməsinə töhfə verib.

Tokay Məmmədovun yaratdığı portretlər arasında Səməd Vurğun, Qəzənfər Xalıqov, Nəriman Nərimanov, Şirəli Müslümov kimi tanınmış simaların təsvirləri yer alır. O, ağac materialından istifadə edərək Azərbaycan heykəltaraşlığında yenilikçi yanaşma nümayiş etdirib. Mərmər, tunc və gipsdən hazırladığı “Üzeyir Hacıbəyli”, “Vəcihə Səmədova”, “F.Şopen”, “Koroğlu” kimi portretləri də sənətkarın zəngin yaradıcılıq palitrasını əks etdirir.

Onun monumental və qabartma əsərləri sırasında Sovet İttifaqı Qəhrəmanı Mehdi Hüseynzadənin portreti xüsusi yer tutur. Həmçinin, Şuşada Bülbül və Mirmöhsün Nəvvabın qəbirüstü abidələri də onun sənət nümunələrindəndir.

Tokay Məmmədovun fəaliyyəti daim yüksək qiymətləndirilib. O, “Şərəf” və “Şöhrət” ordenləri, Prezidentin fəxri diplomu və digər nüfuzlu mükafatlarla təltif olunub. 2018-ci il mayın 2-də vəfat edən sənətkar İkinci Fəxri xiyabanda dəfn olunub.

• "Çekic ve gül"ün üçüncü mövsümü bu tarixdə yayımlanacaq
• "Yaslarda yemək verməkdən imtina etmək lazımdır" - İlham Əziz
• Avqust ayında film axtaranlar üçün - Ən yaxşı 5 film