Dövlət İmtahan Mərkəzinin (DİM) sədri Məleykə Abbaszadə “Azərbaycan dili üzrə sertifikasiya imtahanı”nın onlayn platformasının təqdimat mərasimində Azərbaycan Yazıçılar Birliyinin üzvlərinə, müəllimlərə, elm adamlarına müraciət edərək ana dili imtahanından keçməyə çağırıb:

“Əlimizdə ilkin data olması üçün bizim ilkin olaraq 2000 nəfərin nəticəsinə ehtiyacımız var".

Kulis.az xəbər verir ki, Azərbaycan Yazıçılar Birliyinin (AYB) mətbuat xidmətinin rəhbəri Xəyal Rza açıqlamasında Birliyə üzv olmaq üçün xüsusi qaydaların olduğunu və bu qaydalara uyğun olmayan şəxslərin üzvlüyə qəbul olunmadığını bildirib:

“Söhbət ana dilini, qrammatikanı bilib-bilməməkdən gedirsə, belə insanlar mediada da, dövlət qurumlarında da, AYB-nin üzvləri arasında da var. Bu, çox geniş araşdırılmalı mövzudur. Amma Azərbaycan Yazıçılar Birliyinin üzvləri onsuz da qəbul komissiyasının xüsusi şərt və qaydalarından keçirlər.

AYB-nə üzv olmaq üçün qəbul komissiyasının qaydaları var və müraciət edənlər həmin qaydalara uyğun olaraq sənədlərini təqdim edirlər. Komissiyanın üzvləri onu dəyərləndirir, hətta müraciət edənlərin arasında saysız-hesabsız insanlar var ki, onlara imtina cavabı verilir. Yəni onların əsərləri layiq olmadığı üçün üzvlüyə qəbul olunmursunuz”.

Düşünürəm ki, öz donorlarını başqa yerdə axtarmalıdırlar

O, AYB üzvlərini ana dili imtahanına cəlb edənlərə donoru başqa yerdə axtarmalarını tövsiyə edib:

“Dil məsələsi bəlli qurumların işidir. Düşünürəm ki, öz donorlarını başqa yerdə axtarmalıdırlar, Yazıçılar Birliyinin üzvləri arasında yox.

Amma dil məsələsi çox vacibdir, özünü azərbaycanlı, bu ölkənin vətəndaşı hesab edən bütün insanlar dilə həssas yanaşmalı və öz ana dilini bilməlidirlər. Kimsə onları test etmək istəsə də, istəməsə də”.

• "Düşmənlərin öhdəsindən gəlməyin yolu sərt təzyiq siyasətidir..." - Məşhur alman yazıçının Stalinlə müsahibəsi
• "Tanrı sığalıdır sənin həyatın..." - Şeirlər
• Oğuzların Alen Delonuyla dərdləşmək... - Kamal Abdulla Dədə Qorqudun sirr ortağıdır?