Bu il Azərbaycan xalqının dostu, böyük qırğız yazıçısı Çingiz Aytmarovun anadan olmasının 95 illiyi təntənə ilə qeyd olunacaq. Bu münasibətlə onun yazıçı-tərcüməçi Nəriman Əbdülrəhmanlı tərəfindən dilimizə çevrilmiş “Dağlar yıxılanda” kitabı “Qanun” nəşriyyarında çap olunur.

Kulis.az xəbər verir ki, kitab Qırğızıstan Respublikasının Azərbaycandakı Səfirliyinin dəstəyi, iş adamı Ahmad Javid Jaihonun yardımı ilə işıq üzü görəcək, rəyçisi filologiya elmləri doktoru, professor Bədirxan Əhmədli, mətndəki şeirlərin tərcüməçisi İlqar İlkindir.

Nəşrə ön sözü isə böyük yazıçının oğlu, Beynəlxalq Ç.Aytmatov Fondunun prezidenti Eldar Aytmatov yazıb:

“Hamı və bütün zamanlar üçün bircə mütlər həqiqət var – heç kəs taleyinin necə olacağını, alnına nə yazıldığını qabaqcadan bilmək iqtidarında deyil, kimə nə tale bəxş edildiyini yalnız həyat özü göstərir, yoxsa olub-keçəni heç tale də adlandırmaq olmaz...”

Çingiz Aytmatovun bu sözlərlə başlayan və dilimizə ilk dəfə çevrilən son “Dağlar yıxılanda (Əbədi gəlin)” romanında hadisələr Tyan-Şan dağlarında baş verir, əzab çəkən iki məxluqun – insanın və bəbirin – yolu orada kəsişir. Hər ikisi də zamanın, şəraitin, öz talelərinin qurbanıdır. Əsərin qəhrəmanı ərəb neft maqnatlarının bəbir ovladıqları yerlərə son sevgisini, bəlkə də ölümünü qarşılamaq üçün gəlir. Qarlı dağ keçidində möcüzəli şəkildə gözləri qarşısında canlanan Əbədi gəlin barədə əfsanə isə tamamilə bu dramatik hekayətin toxumasına hopub.

Kitaba ədibin ilk, sonralar üzərində işlədiyi “Üz-üzə” povesti, “Baxiana” və başqa hekayələri də daxil edilib. Hər bir əsərində oxucu bənzərsiz yazıçının böyük ustalığını və səmimiyyətini duyur.

Qeyd edək ki, “Dağlar yıxılanda” kitabının yaxın müddətdə təqdimatı baş tutacaq.

• Azərbaycan alimlərinin töhfəsi - Zadənin arzusunu kimlər həyata keçirdi?
• "Həyat yoldaşınız üçün yaşayın..." - İsveçli yazıçıdan sitatlar
• Dinclik tapmağa gələnlər, "İncil"i oxuyub üz tutanlar və pakistanlı rahib...- Müqəddəs Məryəm Katolik Kilsəsindən reportaj