Kulis.az xəbər verir ki, APA TV Xocalı soyqırımının ildönümündə maraqlı layihə hazırlayıb. Televiziya 2015-16-cı illərdə yayınlanmış "Üç Valet" verilişinin xüsusi buraxılışını Xocalıdan hazırlayıb.

Verilişin aparıcılarından biri olan Qabil Abbasoğlu deyib ki, 2016-cı ilin fevralında APA TV-nin "Üç Valet" verilişini Xocalı soyqırımının ildönümünə həsr etməyi qərara alıblar.

"Verilişə qonaq kimi həm Xocalı sakini, həm həmkarımız, həm də bu faciənin dünyada tanınması üçün məhdud imkanları ilə fədakarlıq göstərən Səriyyə Müslümqızını dəvət etmişdik. Verilişi hazırlayarkən belə bir quruluş düşündük ki, Xocalı faciəsi ədalətli qiymətini, bu vəhşiliyi törədənlər isə layiqli cəzasını almadığı üçün, üstəlik, qonağımız qadın olduğuna görə, üç kişinin ona sual ünvanlaması və onun cavablarını sakit dinləməsi çətin olacaq. Odur ki, biz təqdimatı verib, qonağı tamaşaçılarla baş-başa buraxdıq və studiyadan ayrıldıq. Verilişin sonuna qədər Səriyyə xanım həmin ağrılı hadisələri göz yaşları içində anlatdı. Sonda studiyaya döndük və aparıcı İlqar Rəsul verilişi yekunlaşdırarkən dedi ki, Xocalı hadisələri barədə xeyli suallar açıq qalıb, amma o sualların cavabı mütləq veriləcək, o cavabı verməliyik və verəcəyik".

Qabil Abbasoğlu qeyd edib ki, 2020-ci il Vətən Müharibəsində və 2023-cü il antiterror əməliyyatları zamanı bu cavablar Azərbaycan Ordusu tərəfindən ləyaqətlə verildi: "2024-cü ilin yazında isə Səriyyə xanım Xocalıya - doğulub boya-başa çatdığı evə qayıtdı. Bu, 9 il əvvəl yarımçıq qalmış verilişi öz məntiqi sonluğuna çatdırmaq ideyasını yaratdı. "Üç Valet" layihəsi artıq çoxdan bitmişdi, lakin bu mövzu hələ də açıq qalırdı. “APA Group”-un rəhbəri Vüsalə Mahirqızı ilə danışıb, Səriyyə xanımla studiyada yarımçıq qalmış söhbəti Xocalıdakı evində davam etdirməyi qərarlaşdırdıq. Xocalıda Səriyyə xanımın evində qonaq olduq, bu dəfə başqa aurada, bərpa olunmuş ədalət, verilmiş cəza kontekstində, pozitiv ovqatda bir veriliş çəkdik. Bu, çoxdan fəaliyyətini dayandırmış "Üç Valet"in xüsusi buraxılışı oldu”.

Qeyd edək ki, APA TV-nin "Üç Valet - Cavab gülləri" xüsusi buraxılışı Xocalı soyqırımının növbəti ildönümü - fevralın 26-da saat 15.00-da efirə gedəcək.

Xatırladaq ki, "Üç Valet" verilişi APA TV-nin maraqlı layihələrindən biri olub. Layihəni tanınmış jurnalistlər Qabil Abbasoğlu, İlqar Əlfi və İlqar Rəsul aparıb.

• Qarabağ Milli Parkının yaradılması ilə bağlı işlərə başlanıldı
• Rusiyalı şoumenin İstanbul konserti ləğv olundu - Səbəb
• Əfsanəvi musiqiçi 63 yaşında vəfat etdi