Neçə gündür ki, Qaradağ rayonunda yaşayan şəhid valideynləri övladlarının uyğun olmayan yerdə dəfn olunması ilə bağlı etiraz edir.

Bu cür mənzərə insanı çox məyus edir. Problemin elə də böyük olmadığını, çox rahat həll edilə biləcəyini görmək isə insanı lap hövsələdən çıxarır.

Əvvəla, biz dərk etməliyik ki, şəhidlər bu ölkənin şəxsiyyət vəsiqəsi, pasportudur. Onların məzarları, baş daşları bu torpaqların bizim olduğuna dair ən böyük sənəddir, sübutdur.

İslam dini üçün Məkkə, Kəbə nə qədər müqqədəsdirsə, Vətəni sevənlər üçün də şəhid məzarları bir o qədər müqəddəsdir.

Bəs niyə bəzi məmurlar xalqın müqəddəs bildiyi dəyərlərə qarşı hörmətsizlik etməyi özünə rəva bilir?

Axı bu problem elə də çətin, həlli müşkül məsələ deyil.

Problem bilirsiniz nədədir? Məmurların, yüksək vəzifədə olanların bir çoxu insanların problemini həll etməyə çalışmır.

Heç bu barədə düşünmürlər də.

Onlar üçün vəzifənin tamam başqa anlamı var.

Halbuki ölkə başçısı dəfələrlə onlara xəbərdarlıq edib: vətəndaşlara xidmət etmək sizin borcunuzdur!

Millət vəkilləri deyir, ölkə çiçəklənir, hər şey əladır.

İcra başçıları deyir, ölkə çiçəklənir, hər şey əladır.

Yerdə qalanlar da onların dediyini təkrar edir.

Heç kim problemlərdən danışmaq, onları həll etmək istəmir.

O vəzifələr sizə yalandan “ölkə çiçəklənir” deyəsiniz deyə verilmir, o pullar sizə öz yastığınız altına yığasınız deyə ayrılmır.

Əgər bu gün yüksək vəzifəli məmurlar öz məqamından sui-istifadə etdiyi üçün həbs olunursa, hələ də dövlətin ayırdığı yüksək məbləğli pullar müxtəlif yollarla mənimsənilirsə, deməli yolunda getməyən nələrsə var.

Biz də ölkəmizi, dövlətimizi sevirik, amma yalan danışmaq fikrimiz yoxdur.

Biz ölkəmizin daha da inkişaf etməsini, güclənməsini istəyirik.

Axı niyə problemləri deməkdən çəkinməliyik?

Cənab Prezident dəfələrlə yeni vəzifələrə təyinat zamanı məmurlara tapşırıb ki, xalqın rifahı üçün çalışın, nə problemləri varsa həll edin.

Demək, problemlərin mövcudluğu heç kimə sirr deyil.

Dünən Millət vəkili Aqil Abbas bu məsələ ilə bağlı yazısında çox gözəl bir ritorik sual vermişdi:

“Şəhidlər 20 min kv. km. ərazini işğalçılardan azad edib, indi onlara 2 metr normal qəbir yeri tapmaq olmur?"

Vəzifəsini layiqincə yerinə yetirməyən hər bir məmur işdən kənarlaşdırılmalıdır.

Zibili palazın altına süpürüb nə özünüzü, nə də bizi aldadın.

Dünya bizə baxır.

Ayıbdır!

• Mövlud Süleymanlı: "Tarix bütün dövrlərdə Heydər Əliyevi xatırlayacaq..." - Tarixi Şəxsiyyət
• Tanınmış rejissor karyerasını yekunlaşdırdı - Səbəb
• ADA Universitetində şanlı zəfər tariximiz “Zəfər Rəqsi” filminin nümayişi ilə anıldı