Britaniyalı aktyor Robert Pattinson karyerasının ən məhsuldar və uğurlu illərindən birini yaşayır. Bu il artıq Zendaya ilə "Dram" (The Drama) filmində baş rolu bölüşən və yay blokbasteri "Odisseya"da (The Odyssey) əsas rollardan birini ifa edən aktyor bu dəfə "Praymtaym" (Primetime) adlı yeni layihəsi ilə tamamilə fərqli bir ampluada izləyici qarşısına çıxır.

Kulis.az xəbər verir ki, Pattinson bu filmdə 2004-2007-ci illərdə efirə gedən və uşaq istismarçılarını hədəf alan "Yırtıcını tutmaq" (To Catch a Predator) adlı Amerika teleşousunun aparıcısını canlandırır.

2024-cü ilin martında Syuki Uoterhausdan ilk övladı dünyaya gələn və ata olmasının həyatı "daha əyləncəli" etdiyini deyən aktyor üçün filmin süjeti xüsusilə narahatedicidir. London Kino Festivalındakı nümayiş zamanı BBC kanalına müsahibə verən Pattinson hisslərini belə ifadə edib:

"İstər valideyn olun, istərsə də yox, bu, başınıza gələ biləcək ən dəhşətli şeydir. Bu, təsəvvür edilə biləcək ən qorxunc günahdır".

Televiziya reytinqi, yoxsa polis əməliyyatı?

"A24" studiyasının istehsalı olan yeni kriminal triller potensial istismarçılara qarşı gizli "tələ" əməliyyatları həyata keçirən NBC jurnalisti və şou aparıcısı Kris Hanseni diqqət mərkəzinə gətirir. Vaxtilə reytinq rekordları qıran bu şou həm də araşdırmaçı jurnalistika, hüquq-mühafizə orqanlarının fəaliyyəti və realiti-şou arasındakı sərhədlərin harada bitdiyi barədə ciddi etik suallar doğurmuşdu.

Pattinson şounun mürəkkəb mirasına toxunaraq deyib: "Şou sanki cəmiyyətə belə bir mesaj verirdi: 'Biz uşaq istismarına qarşı nəsə edə bilərik və bunu çox, çox tez edə bilərik'. Bəzi mənalarda bu doğrudur, lakin eyni zamanda inanılmaz dərəcədə güclü bir televiziya məzmunu yaradır və məhz bu nöqtədə məsələ bir az təhlükəli müstəviyə keçir".

Əyləncə sənayesinə münasibətin dəyişib-dəyişməməsi ilə bağlı suala cavab verərkən aktyor bu formatın əslində yoxa çıxmadığını qeyd edib: "Düşünürəm ki, ənənəvi televiziyada (mainstream) bu dəyişib, lakin sadəcə başqa bir şeylə əvəz olunub. İndi oxşar məzmunlar sosial mediada peyda olur. Məni bu şouya cəlb edən də elə bu idi. Çünki 2000-ci illərin əvvəllərindəki formatın demək olar ki, eynisi ilə yeni bir 'yırtıcı ovu' dalğasının başladığını görürdüm və bunun niyə baş verdiyi mənim üçün çox maraqlı idi. Bu trend getdikcə böyüdü və hazırda sosial medianın ən nəhəng mövzularından birinə çevrilib".

"Qızdırmalı yuxu": Rejissor tənqidlərə cavab verir

Prototip Kris Hansen özü isə "X" platformasında yayımladığı videoda filmi sərt tənqid edərək, onu "qəribə" və "reallıqdan qopuq" adlandırıb. Bu tənqidlərə münasibət bildirən filmin rejissoru Lens Oppenheym isə məhz bunu hədəflədiklərini deyib: "Onunla razıyam, onsuz da dizaynımız belə idi. Mən bu filmi heç vaxt reallığın təmsili portreti kimi yox, daha çox qızdırmalı bir yuxu (fever dream) kimi təsəvvür etmişəm". Oppenheym əlavə edib ki, insanların kiminsə kütləvi şəkildə cəzalandırılmasını izləmək istəyində "qədimi" bir meyl var: "Bu, min illərdir mövcuddur. Mən bunu sorğulayan bir ekran işi yaratmaq istədim". Qeyd edək ki, Oppenheym hazırda Natan Filderlə birlikdə Elizabet Holms haqqında da sənədli film üzərində çalışır və həmin layihəni "hər kəsin görməli olduğu xüsusi bir film" adlandırıb.

"Alatoran"dan "Oskar"a doğru

Hazırda 40 yaşı olan Pattinson vaxtilə "Alatoran" (Twilight) seriyasında Kristen Stüartla birlikdə canlandırdığı vampir Edvard Kallen və ondan əvvəl "Harri Potter və Alov Kuboku"nda Sedrik Diqqori rolları ilə gənc nəslin kumirinə çevrilmişdi. O vaxtdan bəri Kristofer Nolanın "Tenet" filmi də daxil olmaqla, bir sıra böyük büdcəli və müstəqil filmlərdə ulduzunu daha da parladıb.

Onun üçün son dərəcə uğurlu keçən bu ilin ardınca gələn illərdə "Dün: Üçüncü hissə" (Dune: Part Three) filmi də gözlənilir. Eyni zamanda yeni "Betmen" filmi də planlaşdırılır, baxmayaraq ki, hazırda çəkilişlərin dayandırıldığı bildirilir. İşə nə vaxt qayıdacaqları soruşulduqda, Pattinson sirr verməyib: "Hələ bilmirik, amma bəli, üzərində işləyirik".

"Praymtaym"ın bu il Pattinsona karyerasında ilk "Oskar" nominasiyasını qazandıra biləcəyi barədə şayiələr də artmaqdadır. O isə buna təvazökarlıqla yanaşır: "Bu işləri ala bildiyim üçün sonsuz minnətdaram. Belə layihələrdə yer almaq – bu, həyatımın ən yaxşı illərindən biridir."

Reytinq xatirinə ədalət: "Yırtıcını tutmaq" fenomeni

ABŞ-ın NBC kanalında yayımlanan və Kris Hansenin təqdim etdiyi "To Catch a Predator" (Yırtıcını tutmaq) şousu öz dövrünün ən mübahisəli və ən çox izlənən televiziya hadisələrindən biri idi. Proqramın formatı onlayn çatlarda yetkinlik yaşına çatmayanlar kimi qələmə verilən "yemlər" vasitəsilə potensial pedofilləri xüsusi evlərə cəlb etmək, orada gizli kameralarla onları ifşa etmək və sonda polisə təhvil verməkdən ibarət idi. Şou cinayətkarların yaxalanmasına kömək etsə də, media mütəxəssisləri və hüquqşünaslar NBC-ni reytinq xatirinə jurnalistika etikasını pozmaqda, insanların şəxsi həyatını məhkəmə qərarı olmadan məhv etməkdə və "televiziya ədaləti" yaratmaqda ittiham edirdilər. Son illərdə "A24" studiyasının bu cür qalmaqallı real hadisələri yüksək gərginlikli, psixoloji trillerlərə çevirmək ənənəsi, xüsusən də müstəqil kinonun ən istedadlı simalarından birinə çevrilmiş Robert Pattinsonun iştirakı ilə "Praymtaym"ı builki mükafat mövsümünün ən iddialı filmlərindən birinə çevirib.

Ülvi Bahadır

• Het imperiyasına aid mixi yazılı lövhələr tapıldı
• Tanınmış rejissor şəxsi əşyalarını Servantes İnstitutuna verdi - Səbəb
• Türkiyənin məşhur qrupu beynəlxalq musiqi səhnəsində