Azərbaycan Kinematoqrafçılar İttifaqının “Şimalda kino günləri” layihəsinin ikinci mərhələsi uğurla başa çatıb.

Kulis.az xəbər verir ki, üç gün davam edən bu mərhələ Şəki, Qəbələ və Oğuz rayonlarını əhatə edib.

Qəbələnin Mədəniyyət Mərkəzində baş tutan ilk nümayişdə yerli tamaşaçılara rejissor Qulu Əsgərovun “Mən burdayam, İlahi” tammetrajlı filmi təqdim olunub. Filmə böyük maraqla baxan tamaşaçılar daha sonra öz təəssüratlarını bölüşüblər.

Layihənin ikinci günü Oğuz rayonunun Mədəniyyət Mərkəzində Əli Səttar Quliyevin “Olimpiya” bədii filmi nümayiş olunub. Filmə baş rolun ifaçısı, Xalq artisti Qurban İsmayılovla birlikdə baxan tamaşaçılar daha sonra aktyora suallarını veriblər.

Tədbirdə Yeni Azərbaycan Partiyasının Oğuz rayon təşkilatının sədr müavini Mehman Ramazanov da çıxış edərək bu cür layihələrin vacibliyindən danışıb.

Oğuz rayonunun Musax Kənd Diyarşünaslıq Evində keçirilən ikinci seansda isə kənd sakinləri gənc rejissor Şirin Əhmədovun “Qütb ulduzu” qısametrajlı bədii və İntiqam Hacılının “Atam, anam, bir də mən” sənədli filmlərinə böyük ekranda baxmaq imkanı qazanıblar.

“Şimalda kino günləri” layihəsinin sonuncu günündə şəkili tamaşaçılar əvvəlcə M.F.Axundzadə adına Şəki Şəhər Mədəniyyət Mərkəzində rejissor İlqar Nəcəfin “Suğra və oğulları”, daha sonra isə Şəki “ASAN xidmət” mərkəzinin kinoklubunda Mirsadıq Ağazadənin “Eviniz abad” filmlərinə baxıblar. “Suğra və oğulları” filminin nümayişindən sonra aparılan ənənəvi müzakirələr zamanı rejissor İlqar Nəcəf tamaşaçıların suallarını cavablandırıb.

Mədəniyyət Mərkəzinin direktoru Ağaəli Cəlilov isə artıq unudulmaq üzrə olan bir ənənəni dirçəltmək təşəbbüsünə görə Azərbaycan Kinematoqrafçılar İttifaqına minnətdarlığını bildirib və bölgələrdə kinoteatrların yaradılmasının vacibliyindən danışıb.

• Xalq artisti vəfat etdi
• Kazım Koyuncu haqqında çəkilən filmdə Cem Yılmaz surprizi
• Reallıqdan qopanlar, yetkinləşməyi rədd edənlər, qocalmaqdan qorxanlar... - Ədəbiyyatdan ilhamlanan 7 psixoloji sindrom