Amerikalı aktyor, kinorejissor və prodüser Corc Kluni 83-cü Venesiya Beynəlxalq Kinofestivalının açılışında fəxri "Qızıl şir" mükafatına layiq görülüb.

Kulis.az xəbər verir ki, bu barədə "Fontanka" nəşri məlumat yayıb.

Festival Kluniyə karyera nailiyyətlərinə görə bu fəxri mükafatın təqdim edilməsi ilə başlayıb. Sənətçi dəfələrlə həm aktyor kimi festivalda iştirak edib, həm də müxtəlif mükafatlar qazanan rejissor işlərini məhz burada təqdim edib. Kluni həmçinin vəkil Amal Alamuddinlə toy mərasimi üçün vaxtilə məhz Venesiyanı seçmişdi. Lido adasındakı Kino Sarayında keçirilən mükafatlandırma mərasimində həyat yoldaşı onu tək buraxmayıb.

Amal Kluni festivalın açılışında qara, bədənəyapışan büzməli donda görünüb. Onun obrazını brilyant sırğa, üzük və qolbaq, həmçinin klatç çanta və şişburun ayaqqabılar tamamlayıb. Saçlarını iri dalğalarla formaya salan Amal çəhrayı dodaq boyası ilə diqqət çəkən axşam makiyajına üstünlük verib. Corc Kluni isə ictimaiyyət qarşısına klassik qara kostyum, ağ köynək və kəpənək qalstukda çıxıb. Kameralar qarşısında aktyor həyat yoldaşını qucaqlayaraq əlindən tutub.

Açılış mərasimində həmçinin "İynə üzərində" (Trainspotting) və "Xarabalıqdan çıxmış milyonçu" (Slumdog Millionaire) filmləri ilə tanınan britaniyalı rejissor Denni Boylun (Danny Boyle) "Mürəkkəb" (Ink, 2026) adlı müsabiqə filmi nümayiş olunub. Yeni ekran işi tanınmış mediamaqnat Rupert Merdoka (Rupert Murdoch) həsr edilib.

Qeyd edək ki, festivalın əsas müsabiqə proqramına 21 film daxil edilib. Onlar əsas mükafatlar, o cümlədən "Qızıl şir", "Gümüş şir", ən yaxşı aktyor işinə görə "Volpi kuboku" və ən yaxşı ssenari mükafatları uğrunda mübarizə aparırlar.

Corc Kluni kimdir?

Corc Kluni (George Timothy Clooney; 6 may 1961-ci ildə anadan olub) — amerikalı aktyor, kinorejissor, prodüser, ssenarist və xeyriyyəçidir. Dünya kinosunun ən xarizmatik ulduzlarından biri hesab edilən Kluni, "Təcili yardım" (ER) serialındakı rolu ilə geniş şöhrət tapıb. O, daha sonra "Ouşenin on bir dostu" (Ocean's Eleven), "Suriya" (Syriana), "Qravitasiya" (Gravity) və "Nəsillər" (The Descendants) kimi hit filmlərdəki çıxışları ilə yadda qalıb. Sənətçi iki dəfə "Oskar" mükafatına layiq görülüb: "Suriya" filminə görə "Ən yaxşı ikinci plan kişi rolu", "Arqo" (Argo) filminə görə isə prodüser kimi "Ən yaxşı film" nominasiyasında. Həyat yoldaşı, beynəlxalq insan haqları hüquqşünası Amal Kluni ilə birlikdə qlobal miqyasda mühüm xeyriyyə layihələrini və insan hüquqları kampaniyalarını dəstəkləyir.

• Tbilisidə Heydər Əliyevin büstü zədələndi - Ermənistan vətəndaşı saxlanıldı
• Dünyanın ən yaxşı 100 şorbası məlum oldu
• "Səni görəndə başıma gələn möcüzəyə məcburən inandım..." - Mika Valtari