Kulis.az Mina Rəşidin yeni şeirlərini təqdim edir.
QUŞLAR HİMN OXUYUR
Yuxudan oyanıb görəm
Bir möcüzə baş verib.
Görəm qapımın ağzına
Çiçəklər xalı sərib.
Dörd bir tərəf ağaclardı
Quşlar himn oxuyur.
Dünya elə qəribədi
Hava çox xoş qoxulu...
Tut tökülür ot üstünə
Uşaqlar, quşlar yeyir.
Tut satan qonşu yox, deyə
Anam dua eyləyir...
MƏN HƏRDƏN ELƏ UÇARAM...
Tikanları qəlbə batan
Çiçəkdən tac hörmədim.
Bu dünya dörd divar imiş
O üzünü görmədim.
Dörd divarın arasından
Boylandım günə, aya.
Yerlə göyün arasında
Dəyişmədi heç dünya.
Çox sevirəm göyüzünü
Uçan quşa baxdım, hey...
Dörd divarın arasından
Gün üzünə çıxdım, hey!..
Adam var qızıl libasda
Ağırlıqdan heç uçmaz.
Mən hərdən elə uçaram
Bu dünya da, baş açmaz...
BU YERDƏ HAMI BİRDİ
Bir-birinə oxşayır
Bu yerdə hamı birdi.
Mənim oxşarım yoxdu
Görəsən bu nə sirdi?
Kim axına qoşulmur
Bəlkə yıxılıb ölsün?!
Mənim gözəl dünyam var!
Bu adamlar nə bilsin...
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
