Uçdu o quş kimi, o bulud kimi,
uçmaqdan doymadı bu sarı yarpaq,
ölümdən qorxmadı o tabut kimi,
ölümlə oynadı bu sarı yarpaq...

çox şeyi biryolluq saldı gözümdən,
böyüdüm, dərdimin oldum dizindən,
üzümü qırışmış gördüm üzündə,
nə zalım aynadı bu sarı yarpaq...

dilimdə sözlərin yuxası gəldim,
nə var çəkinəsi, qorxası...gəldim...
əlimə payızın yaxası gəldi,
açımmı?...düymədi bu sarı yarpaq...

****

Ömrüm boyu bəsdi mənə
bu sevginin hüzünü...
onda səni aldadırdım,
indi özüm özümü...

əzab verib gözlərinə
tapma məni, gizlənirəm...
örtdüm, görmək istəmirəm
güzgülərin üzünü...

necəydin, düşmür yadıma,
şəklin yox, çatsın dadıma...
yenə min şükür adına,
dodaqlarım qızınır...

***

Tərslikdən sağ qalarsan,
nəhs gətirər işlərin,
gecə oyaq qalarsan,
dəyişər vərdişlərin...

atıb getdiyin xanım,
qarşına ərnən çıxar,
dostların biri dərdlə,
biri qəbirnən çıxar...

canından lap bezərsən,
hirsindən qan qusarsan,
halın bir az düzəlsə,
qorxub çiyin qısarsan...

qurtararsan birtəhər,
ölüb ömrün üzündən,
yadına sən düşərsən,
Allah hərdən bezəndə...

****

Gələr eşqin payızı,
sən də çıxıb gedərsən.
Qurtararıq hər şeyi,
sonda çıxıb gedərsən.

Hər şey, hər şey yox kimi,
məktublar yarpaq kimi.
Elə bil bir ah kimi
candan çıxıb gedərsən.

Unut, heç nəyi anma,
günahsa da, arınma.
Tanrı tək gəldin, amma,
bəndə çıxıb gedərsən.

• Bakıda Çingiz Aytmatovun abidəsi qoyuldu - Foto
• 13 aprel - Ümumdünya Rok-n-Roll günüdür
• Təcili əməliyyat olunan Hasan Can Kayanın ilk açıqlaması