Amerikalı aktyor Leonardo Di Kaprio rəssam Leonardo da Vinçi haqqında çəkiləcək bədii filmdə baş rolu oynayacaq. Kulis.z AZƏRTAC-a istinadən xəbər verir ki, amerikalı jurnalist və yazıçı Uolter Ayzeksonun “Leonardo da Vinçi” romanı əsasında çəkiləcək filmin prodüseri də Di Kaprio olacaq.

Roman bu ilin payızında ABŞ-da satışa çıxarılacaq. Kitabın naşirlərinin söylədiklərinə görə, müəllifin təsvir etdiyi hadisələrlə italiyalı rəssamın gündəliyindəki qeydlər, demək olar, eynidir.

Romanı ekranlaşdırmaq hüququnu “Paramount” şirkəti əldə edib. Lakin filmin istehsalına nə vaxt başlanılacağı barədə məlumat verilmir.

Di Kaprio etiraf edib ki, onun ən böyük arzularından biri həmin rolu oynamaqdır. Məsələ burasındadır ki, anası Florensiyada Uffitsi qalereyasını ziyarət edərkən bətnində tərpənən körpəyə məşhur rəssamın şərəfinə Leonardo adı vermişdi. Tanınmış aktyorun adını daşıdığı dahi rəssam haqqında çəkilən filmdə baş qəhrəman obrazını canlandırmaq arzusu da elə buradan qaynaqlanıb.

Qeyd edək ki, yazıçı Uolter Ayzekson məşhurların həyatı haqqında yazılan əsərlərin müəllifi kimi tanınır. Onun “Apple” şirkətinin qurucusu Stiv Cobs haqqında kitabı bestsellerə çevrilərək ekranlaşdırılıb.

• Poçtla bomba göndərən riyaziyyatçı - Qismət
• Musiqili Teatr may repertuarını açıqladı
• Sevgilisini döyən aktyor haqqında məhkəmə qərarı