Bu gileyi bu uşağa bağışla – Şəhriyardan YENİ ŞEİRLƏR

Kulis.az tanınmış şair Şəhriyar del Geraninin yeni şeirlərlərini təqdim edir.

 

***

 

Bir daş altda, bir daş üstə uzanıb gedər ömür,

hamı xəbərsiz olar səni incitdiyimnən.

bircə Allah hər şeyi görür.

Amma məni ən yaxşı sən bağışlayırsan.

Elə gözəl bağışlayırsan ki,

hər dəfə qarşında günahkar olmaq istəyirəm...

 

Bir daş altda, bir daş üstə, ağlama,

əllərini uzat yağışa,

bu səhərin bu çağında

bu pəncərə şəhərin – yağışa əl eyləyən ən gözəl pəncərəsidir

barmaqların elə ahəstə açılır ki

sanki kəpənəklər diksinir...

 

Bir daş altda, bir daş üstə, bir də məni bağışla

bağışla ki, qoy məni

yaş sulara atdığım daşlar da bağışlasın

yuvasını uçurduğum quşlar da bağışlasın

bağışla ki, baxa bilim bu gecənin ay üzünə,

bağışla ki, çıxa bilim bu gecədən

bu dəlinin, sərsərinin, eşşəyin adam üzünə...

 

***

 

Hardan baxsam uzaqdasan

hardan görsəm başqası

heç bilmirəm belə doğma

necə başqalaşırsan?

 

Daha bir də heç gəlmərəm,

heç gəlmərəm yanına,

heç gəlmərəm yaxınına

qızım kimi sevdiyim.

acıyaram, qarğıyaram, deyinərəm eləcə

bilirəm ki, övladını ata qarğışı tutmaz.

 

Daha bir də heç gəlmərəm

bundan sonra yanına

daha bizi bu sahilin martıları tanımaz.

 

Tanrıya da sözüm yoxdu bundan sonra, biləsən

bundan sonra bir ömürlük susub yaşamaq qalır.

 

Amma hər gün, elə hər gün

elə hər gün, hər gecə

hey soruşmaq istəyəcəm

Ki, bir görüm necəsən?

şəkillərdə elə gözəl baxıb gülümsəyirsən.

 

Şəkillərdə elə gözəl baxıb gülümsəyirsən

bircə şəkil səadətə baxıb inanmaq qalır.

şəkillərlə danışacaq sözüm yoxdu, bilirsən

bundan sonra bir ömürlük sənə aldanmaq qalır.

 

Kim aldatdı bizi, qızım?

hansı gedən gəlmədi?

deyirəm ki:

danış görüm

kim böyütdü sənin boyda uşağı?

deyirəm ki:

necə keçir darıxmağın qızım kimi sevdiyim?

dənizlərçün tanışdırmı gəmilərin uzağı?

 

***

 

Telefona zəng gəlir

baxırsan, o deyil

açmırsan.

 

keçirsən mətbəxə

çaya darçın atmırsan

onsuz da o, yoxdur.

 

mesaj səsi... o deyil

 

keçirsən hamama

duş alırsan

bilirsən, o gəlməyəcək

və sənin tər qoxan bədənin

ondan savayı kimsəyə gərək deyil.

deyəsən biryolluq gedib,

amma yenə də diş fırçasını atmağa əlin gəlmir.

 

yəni Allah var

amma sən ona inanmırsan...

 

yenə telefon zəngi

bu dəfə baxmırsan

düşünürsən “bəlkə odur”

amma yenə də baxmırsan

təkrar zəng... baxmırsan

bir də... baxmırsan

bir də... baxmırsan

qorxursan ki, birdən həqiqətən də o olmaz...

 

Ölü göyərçinlər

 

Yağış yağacaq – küçədə

bir topa uşaq – kəsəcək

bir yuva çıxıb qaçacaq

ağacların içinnən...

 

küləklərin sınan yerin

şimşəklər nişan verər

yağışların islandığı

buludların köçündə...

 

səni də sevmiş idim ki

küsməyə yerim olsun

barışmaqçün dən səpərdim

ölü göyərçinlərə

 

səsimə yerikləyənim

darıxıb qurtardım səni

göynəyəsi yer qalmadı

taa burnumun ucunda...

 

***

 

Uzaq bir şəhərə yolun düşərsə,

yollar da uzanıb çıxıb gedərsə,

ömründə bircə yol darıxar isən,

yalın çiyininə bir baxar isən,

görərsən çiynindən baş alıb gedən

bir qərib ağlayır hər uzağında.

Dönüb qayıdarsan, dönüb baxarsan.

Görərsən həmin səs hey arxancadı.

Görərsən təbiət tamam başqadı,

görərsən o quş da budaqdan küsür.

Görərsən səadət tamam başqadı,

görərsən gülüş də yanaqdan küsür.

Baxıb karıxarsan, baxıb susarsan.

Qayıdıb görsən ki, əllərim əsir,

Bağışla...

 

Bağışla o uzaq şəhərə məni,

bağışla uzanıb gedən yollara.

Bağışla, darıxma,

çiynindən baş alıb gedən həmin o qəribin uzağına bağışla.

O quşu o budağa

O gülüşü o yanağa

Bu gileyi bu uşağa bağışla.

 

Qayıtma, əllərim əsir,

Yoxdu bu ömrün yiyəsi,

Bağışla...

 

LENT

21 Noyabr 2017
20 Noyabr 2017
19 Noyabr 2017
18 Noyabr 2017
17 Noyabr 2017