“Mən sənin cib telefonun olmuşam indi” - TELEFON ŞEİRİ

Kulis.Az Qan Turalının “Telefon” şeirini təqdim edir.

 

mən indi Nokia 6210-am

sənin cib telefonunam

70 dollara aldın məni

o an elə sevindim ki,

işi-peşəsi qəzet satmaq olan uşağın

lotereya udması kimi

başımda cinlər oynadı

cin kartını taxdın mənə

sevincdən bütün bədənim titrəyirdi

sandın vibrasiyam işə düşdü

elə o gündən sən hər telefon açanda

titrəyirəm

sən də bunu vibrasiya sanırsan

 

ilk görüş

 

hər görüşümüzdə

barmaqlarınla düyməmə basıb açanda

işığım yanıb sönür

ilk görüşümüzü xatırlayıram

o zaman

göz vurmaqla başlamışdı hər şey

hər görüşdə salamdan əvvəl

göz vurmağa adətkər olmuşduq

indi yalnız mən

keçmiş günlərə sadiqəm

bax hələ də yanıram və sönürəm

 

ilk müşahidələr

 

qəribədir

elə ilk görüşümüzdə

səni satıcı oğlana qısqanmadım

ona qarşı gülümsəməni bağışladım

əvvəllər belə şeylər içimi qəzəblə doldurardı

telefonlar sevə bilər

amma qısqanclığın nə olduğunu bilməzlər

deyə bir fikir keçdi ağlımdan

yanıldım!

hər dəfə birlikdə şəhəri dolaşanda

telefon dükanlarında telefonları görürsən

ya da rəfiqənin

yeni model telefonuna həsrətlə baxırsan

içimdən qara qanlar axır

düymələrim bloka düşür

amma tez açılıram

barterdən qorxuram

 

ilk danışıq

 

səninlə birlikdə olmaq

nə qədər əzizdir mənə

amma ən çox

sənin mənimlə danışmağını sevirəm

çünki bu zaman əllərin korpusuma

yanağın ekranıma toxunur

qara saçlarının arasında yuva qururam

qulağına toxunuram

özümə sığınacaq tapıram

bu qaranlıq dünyada

 

ilk tanışlar

 

çantanda darıxıram

universitetin

altıncı mərtəbəsinin koridorunda

lap küncdə

pəncərənin yanında

sən ağlayan zaman

əlimdən alıb gözyaşlarını sildiyim

selpaklarla söhbətləşirəm

oriflame pomadan qoşulmur bu söhbətlərə

onu əvvəldən sevmədim zatən

dodağını gizlədərdi məndən

 

gəzinti

 

sənlə birgə yeriməyi

gec öyrənmişdim

çünki sən maneken ədasıyla

mənsə poçtalyon təlaşıyla

gəzirdim bitməyən yollarda

indisə belə problem yoxdu

məni sən daşıyırsan

o qədər də ağır deyiləm

cəmi 114 qram

 

xəyanət

 

günlərim xoş keçir

telefonların elektron dünyasında

amma bəzən gözlərimin önündəcə

mənə xəyanət edir

onunla eyni yatağı bölüşürsən

belədə təəssüf dolur içimə

fotoqraf makinam olmadığına görə

bu anı yaddaşıma kopyalayar

sənə olan nifrətimin mənbəyinə çevirərdim

bacarmıram

bəlkə yaddaşım az olduğuna görə

sənə nifrət edə bilmirəm

 

ilk etirafım

 

sən yemək yeyərkən zəng gəlir mənə

rafetin sürgününü mızıldanıram

məni qaldırır

Yes düyməmə basırsan

sevindiyimdən

fikir vermirəm bədənimə yapışan

yemək qalıqlarına

yağa və una

üstünü unlu görüb mənə dəyirmançı bilmə

məsəli belə yaranıb məncə

bir də

telefon deyil

abonent olduğum dönəmlərdə

baş verən bir hadisəni xatırlayıram

canlı bir insan kimi zəng etmişdim sənə

sənsə yemək yeyirdin

köklüyündən, çox yediyində söz açmışdın

mənsə belə də gözəlsən demişdim

səmimi idim sözlərimdə

səni belə sevirdim

indi kimsə demir bu sözləri sənə

telefon Allah şahidi

ancaq hər həftə səni nərmə-nazik qızlarla

dəyişərdim bir neçə saatlığa olsa da

yenidən sənə dönürdüm

görünür məni sənə bağlayan

köklüyün deyilmiş

 

avtobusda

 

birlikdə avtobusa minirik

istidən və basa-basdan tərləyirik

üstəgəl

səni görə bilmirəm

elə vaxt olur ki,

yanındakı oğlanın cibgir olmasından şübhələnib

məni əlinə götürürsən

sevinirəm

elə bil limitsiz internet yükləyiblər mənə

düzü xoşuma gəlir

bulaşmaq əlinin tərinə

 

metroda

 

metroya enirik

qaranlıq tuneldə

əhatə dairəsindən çıxırıq

ancaq ən çox bu saatlarda sən

yalnız mənim

əhatə dairəmdə olduğunu bilmirsən

guya nəyi bilirsən ki....

 

nağıllar dinlərkən

 

öz özünə kitab oxuyursan

mən də xəlvətcə qulaq asıram

gülməlidir keçmiş zamanlarda

sevgililər daşa dönərlərmiş

ayrılanda

nə qədər bədbəxt imişlər

telefona dönmək imkanları yox imiş

darağa dönüb

sevdiyin saçlarda gəzmək

imkanı varsa

nəyə yarar

daşa dönüb çöldə yatmaq

hər nəsə

onları yarğılamaq bizə düşməz

qaliblər və daşlar yarğılanmır

elə telefonlar də

 

son

 

sevgilin ola bilməsəm də

cib telefonun olmaq

qəlbimə təsəllidir

amma sənin xəbərin yox sevgilim

xəbərin yox

xəbərin yox…

 

2005

 

LENT

14 Dekabr 2017
13 Dekabr 2017
12 Dekabr 2017
11 Dekabr 2017