Sənə yazdığım şeirlərdən asacam özümü

Tural Cəfər

 

Yoxluğun

 

Sənin yoxluğun
Mənfi neçə dərəcədi?
Ayrılıq havasında
Məndən soruş deyim sənə,
Nəfəs almaq necədi...

 

İndi sənsiz darıxanlar
Cərgəsinə qoşulmuşam...
Yoxluğunun ad gününü qeyd edirəm,
Səni gözləyirəm bayaqdan.
Həsrətin şirinlik gətirsin deyə,
İki dilim tort kəsmişəm ayrılıqdan....
Sənin üçün adi təqvim,
Mənim üçün son gecədi...

 

Sənə yazdığım şeirlərin birindən,
Lap kədərli olanından -
asacam özümü,
Şahid olacaq intihara sözlərim.
Bir ümidin əllərindən yapışıb,
Xəyalını axtaracaq gözlərim.

 

Sabah tüstüsü çıxacaq bu odun,
Mərhum qoyacaqlar adımı.
Yəqin sən də duyarsan,
Bu məişət qayğılarından,
Az da olsa uzaqlaşıb,
Axır ki mənim haqda,
Bir xəbər oxuyarsan...

 

Sən bilmədin

Sən bilmədin,
bilmədin ki,
məhəbbətin üzünə
qapını bağlayanda,
xoşbəxtlik də 
bayırda qalır...
Kədər evinə girir,
Həsrət yatağına uzanır,
Xəyalların çay kimi,
süfrəyə gəlir...
Sən bilmədin ki,
ürək bir dəfə sevir,
bir dəfə aldanır,
bir dəfə də dayanır...
Sən bilmədin,
bilmədin ki,
ölüm da gizlənqaç kimidi,
tapacaqdı səni nə vaxtsa,
növbə sənə də gələcək,
sakit baxıb susacaqsan,
sən də bu oyunda uduzacaqsan...

 

Uzaqdasan

Sən uzaq bir şəhərdə, 
Kirayə qaldığın evdə, 
Gündəlik məişət qayğıları ilə 
Qucaqlaşıb yatırsan...

 

Xırda qüsurlarını 
gizlətmək əvəzinə,
Hər gün poçta gedirsən, 
Məktub yazıb göndərirsən, 
Naməlum bir ünvana, 
Adsız bir küçəyə...

 

Bəlkə də utanırsan, 
Ya da lap darıxırsan, 
Gecələri ağlayıb, 
Günahkar axtarırsan...

 

Ən acısı budur ki, 
Hər gün bir az da olsa, 
Sevdiyin tərəfindən 
Soyuqqanlı şəkildə, 
Səssizcə unudulursan...

                             

LENT

21 Yanvar 2017
20 Yanvar 2017
19 Yanvar 2017
18 Yanvar 2017
17 Yanvar 2017
16 Yanvar 2017
15 Yanvar 2017
14 Yanvar 2017
13 Yanvar 2017