O qızı Allah bilib inandım

Bayram Mustafazadə

 

Bu şeirləri şeirdən zəhləsi gedən dostum Kənana həsr edirəm

 

Mən də sənin kimi

safam dostum...

Sapam...

Arzu kimi xəyalıma

Saplanmışam.

Sevdiyim qız nişanlıdı,

mənsə ümidimdən

hamilə qalmışam.

Salmışam...

Amma doğacağına

inanmışam

günəşin qaranlıqdan...

 

****

 

“Növbəti çıxışa” deməliydin,

“Farağat” dedin.

İndi bir ömür boyu

farağatda dur, Kənan,

“Azad”ı gözləmə…

Sən onluda,

sən onsuz da

bu sevginin

köləsisən.

Bir gün sən də

mənim kimi

bir istəklə

öləsisən:

Azad olmaq...

 

***

 

Bu bir fəlsəfədi, dostum.

Düz bildiyin səhv,

səhv bildiyin düz çıxır.

düz də səni yıxır,

Səhv də səni yıxır.

Allah hamının inandığı,

heç kəsin inanmadığı biridi.

Allah ölməyib, dostum,

Allah diridi.

O qızı Allah bilib inandım.

Sevdiyini tanı...

İnan ki,

inanmayacaqsan Allaha...

 

***

 

Ad günümüz-anamızın

ağrılarının il dönümü...

ayrıldığımız gün-əzablarımızın

ad günüdü...

Bilmirsən, Kənan.

Bilmirsən

içkini ağrını

keyitmək üçün

istifadə etməyin

bədbəxtliyini...

Görməmisən, Kənan.

Görməmisən

sevdiyinin başqa biri

ilə olan xoşbəxtliyi...

Axtarma onu:

Zəng etmə,

mesaj yazma...

Göstərmə öz

acizliyini...

Göstərmə, Kənan.

 

***

 

Və onda-

nə vaxtsa görsən onu

Pıçılda gözlərinə:

De ki,

hərdən yadıma düşürsən,

üşüyürəm...

Başqa heç nə...

LENT

23 İyun 2017
22 İyun 2017
21 İyun 2017