Kulis.az gənc şair Elvin Bakiroğlunun yeni şeirlərini təqdim edir.

33 yaşın şeiri

onu heç nə gətirmir,

aparır fikir məni.

İsa yaşlı sevgilim

çarmıxa çəkir məni.

əllərim mismarlanıb

göyə, duadan ötrü.

gözlərim iki Məryəm,

ağlar İsadan ötrü.

ondan bir də doğulmaz,

onu gəzmək günahdı.

onu görməyin yolu

gözünü qapamaqdı.

o, hər yaşda eynidi,

dəyişməz gözəlliyi.

onun çox ağıllıdı

tərsliyi, dəcəlliyi.

o, indi burda yoxdu,

amma burdadı indi.

o, onu alanın yox,

o, onu sevənindi.

mənimdi, təkcə mənim,

aləmin xəbəri yox.

onu özüm doğmuşam,

Məryəmin xəbəri yox...

Süpürgəçi qız

küçəsinə kim su səpər

küçəni süpürən qızın?

üzündən toz-torpaq öpər

bəxtinə tüpürən qızın.

unudub bütün aləmi

elə öz işini görür.

oturub dincələn kimi

qaşları da yer süpürür.

süpürgənin üstündəki

saçaqları yolur bir-bir.

öyrənmək istəyir sanki

Sevir, sevmir, sevir, sevmir…

Zibil Qutusu

O, sevgiyə inandığı gündən zibilə düşdü,

zibilə düşdüyü gün sevgiyə inandı.

İnandı ki sevgi zibil kimi bir şeydi,

inandı ki adam cildində sevgi olmur.

dedi ki zibilə qalsın bu sevgini!

O gündən sonra zibil qutusunu sevməyə başladı -

yazdığı məktubların hamısını ora göndərdi...

***

(Cəlil Cavanşir üçün)

Eşitmədim bir anonsda desinlər ki:

"gözəl günlər gələcəklər!"

Bayquş yuvasıdı ürəklər...

bəxtlər şimal ayısıdı...

bir şairin bir gecəlik darıxmağı

bir qadının üç mövsümlük sancısıdı...

Ölümlə məzələnir adamlar,

getməyə yeri qalmayan bir gənc indi hara getsin?

onu kefmi məcbur edir durub intihara getsin?

Guya heç kim bilmir ki,

ehtiyaca yıxılmaq da,

cəmiyyətdən çıxılmaq da,

bir tikə çörəkdən ötrü

özündən ağır bir daşın altına soxulmaq da

intihara təşəbbüsdü

və intihar bu dünyayla o dünyanın

arasında beş dəqiqəlik tənəffüsdü.

Səndə də az yoxdu, abi,

bilirəm,

bir gün sən də özünü öldürəcəksən,

əcəl qapını döyəndə deyəcəklər ki:

elə o da səni qarşılamağa çıxdı...

Sevginin bir üzü

Sevginin bir üzü qaradı həmişə

qadın kişini sevir ki başqa birini unutsun

kişi qadını unudur ki başqa birini sevsin

qadının sevdiyi kişi çarədi

kişinin sevdiyi qadın çarəsizlik

Sevginin bir üzü qaradı həmişə

qadın sözündə durur və kişi kimi unudur kişini

kişi qadın kimi ağlayır qadının kişiliyinə

və qadın bir az da unudur

baxıb kişinin qadınlığına

Sevginin bir üzü qaradı həmişə

qadın kişini söyür ki sevməsin

kişi qadını sevir ki söyməsin

qadın kişiyə içini boşaldır

kişi qadına ürəyini

Sevginin bir üzü qaradı həmişə

qadının gözəlliyi kişini kor eləyir

kişinin korluğu qadının gözünü açır

qadın gözəl olanda kişi evindi

kişi kor olanda qadın küçənin

Sevginin bir üzü qaradı həmişə

qadından kişiyə xatirə qalır

kişidən qadına qoxu

kişi qadının heç nəyidi

qadın kişinin var-yoxu

Svginin bir üzü qaradı həmişə

orda ya qadın olur ya kişi

ikisindən biri çatmır

qadının kişi yanında nə ölümü

kişinin qadın yanında nə işi

• "Bakıda silahlı cinayət olub..." - El Roman
• Kinau Rivzin yeni layihəsi: "Sonik 3"
• Belarus Mədəniyyəti Günlərinin təntənəli açılış mərasimi keçirilib